oleh

Dirusoh kek Mertua

BERIJAU muka Ayak Resat pas kena skak-ster mertua laki e hal duit mulang melei pempek lusa mari e. Ndog, imang e kemana duit e. Yo kita bace bai cerita di baweh ne.

Jadi kisah e, berape minggu ne mertua Yak Resat yang laki nampek ke Pengkal, lah jelas mun mertua dari kampung dateng ke mana muah nginep e mun ukan di umah Yak Resat. Sekian banyek menantu e, Yak Resat ketak yang tinggal di Pengkal, nek dek neklah. Nama ge urang tua, pasti banyek kenek e, ceriwet, luk kali urusan pemaken.

loading...

“Sara ge Bay ok tengah ne. Dek usahlah bekisah maken dek belaok, maken yang ade laok e ge tah kadang renyek kadang dek, kadang maen tingok ketak, dek nafsu apalah. Ukan dicara ceriwet e, tapi tengah ne tah ngapa banyek umun kenek asak hal maken, nginggel,” kata mertua laki Yak Resat ke Bik Jubay, bini Yak Resat.

“Tau ngapalah Bak, nama ge cara urang lah tua cem bak ne, nekya imang, dek hiran. Tengah ne Bak renyek maken apa, kame pacak gi melei e, pindek ayat e Bak,” tanyak Bik Jubay.

‘’Aok, benerlah ya Bak, apa kerenyek Bak, sukorla riken e mun di Pengkal ne, pemaken nyeratak, ade pa dek duit e. Mun Bak nek melei pemaken yang Bak renyek e pacak muah ngisik perot tua ya, dek kawa kelak lah masok angen ulik, badan Bak ya lah dek sepira agik mun kek kena kerok,” kata Yak Resat.

‘’Ko renyek pempek kih, tapi cukak e jangen nua igek ikak merik cabik e, ancok gawi, bareng dek temaken, yang ade ko sibang-abuh ke kakos,” kata mertua laki Yak Resat.
Dek lama sudeh ya mertua e merik duit sratos ribu selembar riken e kek melei pempek bangso 2 bungkus. Dek lama nyengul muka Yak Resat ingger-ingger mawek bungkus plastik item isik pempek mertua e.

Tapi gek pempek ketak yang diberik Yak Resat, duit mulang e dikde basa-basi apalah, nya cak-cak gile. Mertua e diem bai. Mertua e cak-cak budu. Sepagi e mertua laki e mintak belei agik, tapi nya nek bakso urat.

“Anok, cube ikak tulong Bak belei bakso urat, ko nek yang nyamen, ko gak sebasing, mun pacak tambeh kek yang isik pakai telok ya. Tah ngapa renyek ngentem bakso urat,” kata mertua e.

Komentar

BERITA LAINNYA