oleh

Dek Telalu Ngerusoh Angpau

YAK Resat akher-akher ne gile kek ngerutuk surang. Pindek hal e, nya ngerasa naseb e dek asi berubeh-berubeh dari taon ke taon. Tengah ne Yak Resat ngerasa rejeki e lenges gale. Lukak kedudi e ade di Hp nya yang lama, nokia bleksinter e. Ya ge dek pacak agik diarep. Ngapa pacak nekya Yak?, bace bailah cerita e sampai pengabis ok.

Peteng hari ya Yak Resat riken e cem urang-urang biaselah, mace koran di tiras umah e, kanti e Mang Rojali, dikata sepradik adelah bau-bau e, dikata kawan lah liwat.

loading...

Pas sudeh mace koran ya Yak Resat cem urang tenguk, maseng muka budu. Nya baru terinteng dek lama agik kek Kongyan, ya ge gara-gara nya setingok kek poto amoy di koran.

‘’Oh aokle Li, asa ko suat agik kek Kongyan, boh nya e,” kata Yak Resat besambil nyedot kupi hasil racik urang umah e, kentel, belemek ulik.

‘’Dek bulek aben yak, abis bulan nelah setao ko Kongyan e. Apa kisah, ade rencana apa kira-kira kita ne, men sekira ade lukak yoh ajek pradik ki ne, bos timah mana kek kita tatak, ko acak ngunceng ki,” Mang Ali nanyak sambil muter badan e dikit biar pacak ningok muka Yak Resat.

‘’Sebenar e Li men ki nek tau, ngerueh rencana di utek ko ne, tapi yalah ancok banai gale gara-gara Hp lama ko ilang. Ki kan tau geh, ko lah makai Hp baru, android, Hp yang pacak nunton pideo tapi dikde aben pincet-pincet e. Ki dikde kan?, dek gaul ki ne Li. Hp lama ko jatuh entah dimana pas ko bemutor, pas mari ya ko makai sepan bahan, kantong beleh kanen e bulong upa e Li,” kata Yak Resat ngejelas kronologis dek penting ya ke Rojali sambil ngaruk-ngaruk palak e.

‘’Ukan. Maap sebelum e ne pradik ukan di ko kurang ajar kek urang tua, maap men sekira ko dek nyambung apa yang ki umong ne. Segale sepan bahan ki bawek-bawek. Ko nek betanyak, kira-kira apanya hubungan rencana ki ya kek Hp ki yang ilang ya? Maap tapi ne ok ukan di ko kurang ajar,” Mang Ali nanyak agik.

‘’Hp lama ko yaa ko madeh ki, bepenoh numor-numor urang penting di Babel ne, kawan ko gale ya. Mulai dari numor kawan sama-sama nganggur, kawan tukang catot, pejabat, sekda, sampai Kapolda ge ade di Hp ko ya Li. Numor makjan ge ade, tapi nama e ko gentik, dek kawa keceker urang umah, balu isik ko keceker kek ayuk ki. Jadi ki paham kan Li cemana ko rugi besak gara-gara Hp ya ilang, cemana boh Kapolda nek ngubung ko, men nya nek nyarik uto seken. Ngarep ki sama kek bulek la, asak ke umah ko dek suah mawek rukok, penoh umun alasan ki,” kata Yak Resat, agiklah belagak e.

‘’Aoklah ko paham mun ya Yak, ko paham asak ki dek belagak seari bai, kurap sebadan-badan. Tapi yang ko agik lom pahamlah, apanya hubungan kek rencana tadik ya,” agiklah Mang Ali lom paham-paham.

‘’Haydaah ki ne, lah sekaker, budu ulik. Saking medit e duse ge ki gak magi-magi kek urang. Kerialah ki ne agik ade bau-bau dari beleh urang umah ko. Ne ko madeh ki ok, seandai Hp ya dek ilang, pacak bai tengah ne ko nelpon bos-bos timah kawan ko ya, A Men, A Saw, A Lun, bos timah gale ya. Pacak-pacak ko lah spik nanyak kabar, ade di mana. Sapa tau gara-gara ko spik nanyak ya, tebukek umong kaben nya yang imang tengah kita arep ne. Momen ne pas Li, kek Kongyan,” dijelas kek Yak Resat panjeng libar.

‘’Ooohh, nekyaa maksod ki yak, madeh dari tadik yak. Sapa tau bos timah sekaban ya nyuroh kita nampel ke umah bennya, aok kan. Kita pacak silaturahmi, luk kali sapa tau dapet angpau. Cube dari tadik ki ngejelas e. Maka ko madeh kek ki yak, ke adep ne, men sekira ade numor urang-urang penting ya simpen di Hp ko, jadi men sekira ilang agik ade di Hp ko,” usul Mang Li.

“Aok Liii… Nekyalaa maksod ko, lah jelas kan. Kadang utek ki ne nek maen pancing luk rupa e, cemkek mesen aik lama ko ya. Ne akibat Hp ilang dek bejalen rencana kita,” tambeh Yak Resat.

Hahaha, jadi maksud ki ya Yak, andai Hp lama ki dek ilang, segale kawan kek ki telpon ki ngarep diberik angpau pas kongyan. (emp)

Komentar

BERITA LAINNYA