oleh

Keciri Lah Tua e, Yak

NAPAS Yak Resat ngap-ngap naek tanggek ruko tempet rapat timses caleg andalan e. Way, dek ampon e abis Yak Resat kena asen kawan-kawan sesama timses, termasuklah Ayak Amat yang imang terkenal sungot e judes cem percon cabik ari raya. Nekmana kisah e, alung bace bai berita di baweh ne ok.

Sure mari e, Yak Resat kek Yak Amat disuroh dateng ke salah sikok ruko lima lantai dek jauh dari arah Jalen Balai, lah kek masok wilayah Pintu Aer.

Loading...

loading...

Ruko ya rupa e imang markas pemenangan salah sikok caleg yang rencana e nek betarung di taon 2019 kelak di pemilihan legislatif daerah Pengkal, entah dapil mana.

Ikak bayang, Yak Resat lah tua cemya, rukok ge lah maen linting, naek ke lantai lima dek asi istirahat, dek ampon e napas Yak Resat ngap-ngap, senen-kemis, asa-asa idup dek renyek mati beguyur sangking nya keleteh e.

“Ngapa yak, cemkek saroh umun idup ki ne, baru udeh ngelantek lapang futsal ok, cem urang baru sudeh maen bal lapang besak,” Yak Resat kena tanyak kek kawan e sesama timses pas nya ngedor pintu ngaroh mintak minom, keradang.

“Biase la cek, ko ge hiran cemkek lah saroh umun bejalen ne. Macem kek saroh seumat-umat naek ke lantai lima ruko ne. Asa-asa dek asi nyampai, mana kaki ngilu gale dari ujung jempol sampai ke… ah, ki taulah sampai mana,” Yak Resat nyawab pertanyaan kawannya tadik e, suara e sengah kedengar sengah dek, ngator napas ge berat.

“Dek urung jawaban Yak Resat yang cem urang baru sudeh kena kejer asuk ya muet kawan-kawan e ngakak dek ngerina agik. Pas ulik muka Yak Resat nambeh bumbu ketabe.

“Cemne bailah, kelak kita ramai-ramai mereh bos, kita ngusul cemana men ruko ne paseng kek lift, apa dek tanggek bejalen. Ukan apa, kesian kita ningok urang tua ne, macem kek saroh naek ke ne. Cara urang tua lah, imang saroh bawek ke tengah, nekmana men kami ajek begawi berat, nancep baliho, suah-suah kami yang kek besibuh mawek nya ke UGD,” kata Yak Amat, yang imang paling kawa ngage Yak Resat. Rombongan ya paham sungot Yak Amat dek belampu, sekenek perot asak nguap.

Komentar

BERITA LAINNYA